طوقوزنجى سوز
بِسْمِ اللّٰهِ الرَّحْمٰنِ الرَّحِيمِ
فَسُبْحَانَ اللّٰهِ حِينَ تُمْسُونَ وَ حِينَ تُصْبِحُونَ ٭
وَ لَهُ الْحَمْدُ فِى السَّمٰوَاتِ وَ اْلاَرْضِ وَ عَشِيًّا وَ حِينَ تُظْهِرُونَ
أى برادر! بندن، نمازكۡ شو معيّن بش وقته حكمتِ تخصيصنى صورييورسكۡ. پك چوق حكمتلرندن يالكۡز بريسنه إشارت ايدرز.
أوت هر بر نمازكۡ وقتى، مهمّ بر إنقلاب باشى اولديغى گبى، عظيم بر تصرّفِ إلٰهينكۡ آيينهسى و او تصرّف ايچنده إحساناتِ كلّيهِٔ إلٰهيهنكۡ برر معكسى اولديغندن، قديرِ ذو الجلاله او وقتلرده داها زياده تسبيح و تعظيم و حدسز نعمتلرينكۡ ايكى وقت اورتهسنده طوپلانمش يكوننه قارشى شكر و حمد ديمك اولان نمازه أمر ايديلمشدر. شو اينجه و درين معنايى بر پارچه فهم ايتمك ايچون "بش نكته"يى نفسمله برابر ديكۡلهمك لازم...
برنجى نكته: نمازكۡ معناسى، جنابِ حقّى تسبيح و تعظيم و شكردر. يعنى، جلالنه قارشى قَولاً و فعلاً سُبْحَانَ اللّٰهِ دييوب تقديس ايتمك. هم كمالنه قارشى، لفظًا و عملاً اَللّٰهُ اَكْبَرُ دييوب تعظيم ايتمك. هم جمالنه قارشى، قلبًا و لسانًا و بدنًا َالْحَمْدُ ِللّٰهِ دييوب شكر ايتمكدر. ديمك تسبيح و تكبير و حمد، نمازكۡ چكردكلرى حكمندهدرلر. اوندندر كه، نمازكۡ حركات و أذكارنده بو اوچ شى، هر طرفنده بولونويورلر. هم اوندندر كه، نمازدن صوكۡره، نمازكۡ معناسنى تأكيد و تقويه ايچون شو كلماتِ مباركه، اوتوز اوچ دفعه تكرار ايديلير. نمازكۡ معناسى، شو مجمل خلاصهلرله تأكيد ايديلير.
ايكنجى نكته: عبادتكۡ معناسى شودر كه: درگاهِ إلٰهيده عبد، كندى قصورينى و عجز و فقرينى گوروب كمالِ ربوبيتكۡ و قدرتِ صمدانيهنكۡ و رحمتِ إلٰهيهنكۡ اوكۡنده حيرت و محبّتله سجده ايتمكدر. يعنى ربوبيتكۡ سلطنتى، ناصلكه عبوديتى و إطاعتى ايستر؛ ربوبيتكۡ قدسيتى، پاكلگى دخى ايستر كه: عبد، كندى قصورينى گوروب إستغفار ايله و ربّنى بتون نقائصدن پاك و مبرّا و أهلِ ضلالتكۡ أفكارِ باطلهسندن منزّه و معلاّ و كائناتكۡ بتون قصوراتندن مقدّس و مُعرّا اولديغنى؛ تسبيح ايله سُبْحَانَ اللّٰهِ ايله إعلان ايتسين.
هم ده ربوبيتكۡ كمالِ قدرتى دخى ايستر كه: عبد، كندى ضعفنى و مخلوقاتكۡ عجزينى گورمكله قدرتِ صمدانيهنكۡ عظمتِ آثارينه قارشى إستحسان و حيرت ايچنده اَللّٰهُ اَكْبَرُ دييوب خضوع ايله ركوعه گيدوب اوكۡا إلتجا و توكّل ايتسين.
هم ربوبيتكۡ نهايتسز خزينهِٔ رحمتى ده ايستر كه: عبد، كندى إحتياجنى و بتون مخلوقاتكۡ فقر و إحتياجاتنى سؤال و دعا لسانيله إظهار و ربّنكۡ إحسان و إنعاماتنى، شكر و ثنا ايله و َالْحَمْدُ ِللّٰهِ ايله إعلان ايتسين. ديمك، نمازكۡ أفعال و أقوالى، بو معنالرى تضمّن ايدييور و بونلر ايچون طرفِ إلٰهيدن وضع ايديلمشلر.
اوچنجى نكته: ناصلكه إنسان، شو عالمِ كبيركۡ بر مثالِ مصغّريدر و فاتحهِٔ شريفه، شو قرآنِ عظيم الشانكۡ بر تمثالِ منوّريدر. نماز دخى بتون عباداتكۡ أنواعنى شامل بر فهرستهِٔ نورانيهدر و بتون أصنافِ مخلوقاتكۡ ألوانِ عبادتلرينه إشارت ايدن بر خريطهِٔ قدسيهدر.
دردنجى نكته: ناصلكه هفتهلق بر ساعتكۡ ثانيه و دقيقه و ساعت و گونلرينى صايان ميللرى بربرينه باقارلر، بربرينكۡ مثاليدرلر و بربرينكۡ حكمنى آليرلر. اويله ده؛ جنابِ حقّكۡ بر ساعتِ كبراسى اولان شو عالمِ دنيانكۡ ثانيهسى حكمنده اولان گيجه و گوندوز دورانى و دقيقهلرى صايان سنهلر و ساعتلرى صايان طبقاتِ عمرِ إنسان و گونلرى صايان أدوارِ عمرِ عالم بربرينه باقارلر، بربرينكۡ مثاليدرلر و بربرينكۡ حكمندهدرلر و بربرينى خاطرلاتيرلر. مثلا:
فجر زمانى، طلوعه قدر، أوّلِ بهار زماننه، هم إنسانكۡ رحمِ مادره دوشديگى آواننه، هم سماوات و أرضكۡ آلتى گون خلقتندن برنجى گوننه بكۡزر و خاطرلاتير و اونلردهكى شئوناتِ إلٰهيهيى إخطار ايدر.
ظهر زمانى ايسه، ياز موسمنكۡ اورتهسنه، هم گنجلك كمالنه، هم عمرِ دنيادهكى خلقتِ إنسان دورينه بكۡزر و إشارت ايدر و اونلردهكى تجلّياتِ رحمتى و فيوضاتِ نعمتى خاطرلاتير.
عصر زمانى ايسه، گوز موسمنه، هم إختيارلق وقتنه، هم آخر زمان پيغمبرينكۡ (عليه الصلاة والسلام) عصرِ سعادتنه بكۡزر و اونلردهكى شئوناتِ إلٰهيهيى و إنعاماتِ رحمانيهيى إخطار ايدر.
مغرب زمانى ايسه، گوز موسمنكۡ آخرنده پك چوق مخلوقاتكۡ غروبنى، هم إنسانكۡ وفاتنى، هم دنيانكۡ قيامت إبتداسندهكى خرابيتنى إخطار ايله، تجلّياتِ جلاليهيى إفهام و بشرى غفلت اويقوسندن اويانديرر، ايقاظ ايدر.
عشاء وقتى ايسه، عالمِ ظلمات، نهار عالمنكۡ بتون آثارينى سياه كفنى ايله ستر ايتمسنى، هم قيشكۡ بياض كفنى ايله ئولمش يركۡ يوزينى اورتمسنى، هم وفات ايتمش إنسانكۡ بقيّهِٔ آثارى دخى وفات ايدوب نسيان پردهسى آلتنه گيرمسنى، هم بو دارِ إمتحان اولان دنيانكۡ بتون بتون قپانمسنى إخطار ايله قهّارِ ذو الجلالكۡ جلاللى تصرّفاتنى إعلان ايدر.
گيجه وقتى ايسه، هم قيشى، هم قبرى، هم عالمِ برزخى إفهام ايله، روحِ بشر رحمتِ رحمانه نه درجه محتاج اولديغنى إنسانه خاطرلاتير. و گيجهده تهجّد ايسه، قبر گيجهسنده و برزخ قراكۡلغنده نه قدر لزوملى بر ايشيق اولديغنى بيلديرر، ايقاظ ايدر و بتون بو إنقلابات ايچنده جنابِ منعمِ حقيقينكۡ نهايتسز نعمتلرينى إخطار ايله نه درجه حمد و ثنايه مستحق اولديغنى إعلان ايدر.
ايكنجى صباح ايسه، صباحِ حشرى إخطار ايدر. أوت شو گيجهنكۡ صباحى و شو قيشكۡ بهارى، نه قدر معقول و لازم و قطعى ايسه، حشركۡ صباحى ده، برزخكۡ بهارى ده او قطعيتدهدر.
ديمك بو بش وقتكۡ هر برى، بر مهمّ إنقلاب باشنده اولديغى و بيوك إنقلابلرى إخطار ايتديگى گبى؛ قدرتِ صمدانيهنكۡ تصرّفاتِ عظيمهِٔ يوميهسنكۡ إشارتيله؛ هم سنوى، هم عصرى، هم دهرى، قدرتكۡ معجزاتنى و رحمتكۡ هداياسنى خاطرلاتير. ديمك أصل وظيفهِٔ فطرت و أساسِ عبوديت و قطعى بورج اولان فرض نماز، شو وقتلرده لايقدر و أنسبدر.
بشنجى نكته: إنسان فطرةً غايت ضعيفدر. حالبوكه هر شى اوكۡا ايليشير، اونى متأثّر و متألّم ايدر. هم غايت عاجزدر. حالبوكه بلالرى و دشمنلرى پك چوقدر. هم غايت فقيردر. حالبوكه إحتياجاتى پك زيادهدر. هم تنبل و إقتدارسزدر. حالبوكه حياتكۡ تكاليفى غايت آغيردر. هم إنسانيت اونى كائناتله علاقهدار ايتمشدر. حالبوكه سَوْديگى، اُنسيت ايتديگى شيلركۡ زوال و فراقى، متماديًا اونى اينجيتييور. هم عقل اوكۡا يوكسك مقصدلر و باقى ميوهلر گوسترييور. حالبوكه ألى قيصه، عمرى قيصه، إقتدارى قيصه، صبرى قيصهدر.
ايشته بو وضعيتده بر روح، فجر زماننده بر قديرِ ذو الجلالكۡ، بر رحيمِ ذو الجمالكۡ درگاهنه نياز ايله نماز ايله مراجعت ايدوب عرضحال ايتمك، توفيق و مدد ايستهمك نه قدر ألزم و پشيندهكى گوندوز عالمنده باشنه گلهجك، بلنه يوكلهنهجك ايشلرى، وظيفهلرى تحمّل ايچون نه قدر لزوملى بر نقطهِٔ إستناد اولديغى بداهةً آكۡلاشيلير.
و ظهر زماننده كه،
